Periaaseq
Saqqummersitami uani innuttaasut amerlassusissaannik naatsorsuinermi tunngavigineqartoq nassuiarneqarpoq, innuttaasut amerlassusissaannik naatsorsuutinut ilimagisat suunersut ilanngullugit, 2018-imiit 2050-imut innuttaasut amerlassusissaannik naatsorsuutit Naatsorsueqqissaartarfiup kisitsisaataasiviani (http://bank.stat.gl/benp18) pissarsiarineqarsinnaapput.
Innuttaasut amerlassusissaannik naatsorsuinermi tunngaviusoq ukiut siulianni atorneqartarsimasumit nutaajuneruvoq. Teoretiskiusumik tunngavia taamaaginnaraluartoq Naatsorsueqqissaartarfimmut periarfissat nutaat takkunnerisa kingorna allanngortinneqartariaqarsimavoq. Naatsorsuinermi periutsit ilaat aamma allanngortinneqarput.
Naatsorsueqqissaartarfimmit regneark atorlugu uani naatsorsuinermi tunngaviusoq suliarinerpoq, taanna najoqqutap kodia atorlugu najoqqutamut tunngaviusumut allanullu atuisunut soqutiginnittunut Excel-imik atuinissamut periarfissaqaraanni ingerlateqqinneqarsinnaavoq. Kodi atorlugu kisitsisit naatsorsorneqarsinnaapput saniatigullu periarfissanik allanik aamma naatsorsuisoqarsinnaalluni. Regnearkip naatsorsueriaasii tamanut isertuussinani saqqumipput paasinarluinnarlutik.
Naatsorsuinermi tunngaviusumi Naatsorsueqqissaartarfiup Kisitsisaataasivianiittut kisitsisit tunngavigineqartut atorneqarput, Kisitsisaataasiviup API-a tassani atorneqarpoq. Tabelit kisitsisit tunngaviusunik imaqartut tassaapput inuit amerlassusaanut tunngasut aamma inunngortartut pillugit kisitsisit, inunngortartut erninermi anaanaasa ukiuinut kinguaariaanullu sorlernut ilaanerinut immikkoortinneqarnikuupput.
Naatsorsueqqissaartarfimmit, ukiuni kingullerni tallimani aamma/imaluunniit qulini innuttaasut amerlassusiisa ineriartorsimanerat malillugu innuttaasut amerlassusissaat, naatsorsorneqartarsimagaluarpoq. Assersuutigalugu, ukiut kingullit qulit ingerlanerini Kalaallit Nunaannit nuuttartut ukiumut 400-iusarput. Tassa oqaatigineqarsinnaavoq inuit 4.000-it ukiut qulit ingerlanerini Kalaallit Nunaannit nuukkumaartut, Kalaallit Nunaannit nuuttarneq pissutaalluni Kalaallit Nunaanni najugaqartut 4.000-inik ikinnerulissasut, innuttaasut amerlassusissaasa naatsorsorneqarnerisa takutippaat.
Tamanna ukiut amerlavallaanngitsut ingerlanerini innuttaasut amerlassusissaannik naatsorsuinerni atorneqarsinnaavoq, kisianni assersuutigalugu ukiut 30-t qaangiuppata innuttaasut amerlassusissaannik naatsorsuinermuunngitsoq. Taamaattumik naatsorsuinermut tunngaviusoq nutaamik naatsorsuinermut atortussamik pisaarpoq, taanna atorlugu Kalaallit Nunaannut aamma Kalaallit Nunaannit nuuttussanut tulluarsarneqarput. Taamaasilluni aamma innuttaasut amerlassusissaannik naatsorsuinermi ukiup arlaqartut ingerlanerini imaluunniit ukiup tulliani Kalaallit Nunaannit nuuttoqartarunnaarnissaa ilanngunneqarpoq.